У Беларусі адкрылася новая сетка крамаў «Вожык», якая развівае фармат «каля дому». Першая крама з’явілася ў Гродне. MOST расказвае, што можна купіць у «Вожыку» і чаму яго параўноўваюць з польскай «Жабкай».
Мяса, корм для жывёл і тавары для дому
Сетка крамаў «Вожык» належыць кампаніі «ЮниСтор Групп», якая таксама валодае сеткамі «7 пятниц», «Юнистор» і з’яўляецца бізнэс-структурай кампаніі «Евроторг».
Крамы плануюць адкрыць у сталіцы, абласных і раённых цэнтрах. У гандлёвым рэестры фігуруюць чатыры крамы з такой назвай — па адной у Гродне, Віцебску, Магілёве і Мінску.
Першая крама сеткі «Вожык» з’явілася ў Гродне, на вуліцы Курчатава, 22. У асартыменце — мясныя і кандытарскія вырабы, малочная прадукцыя і бакалейныя тавары. Прадумана зона садавіны і агародніны, а таксама стэлажы з напоямі. Ёсць і корм для жывёл, бытавая хімія і тавары для дому. Абяцаюць даступныя цэны і зніжкі да 45%.
«Вожык» — аналаг польскай сеткі «Żabka»
Як піша агенцтва «Центр жилья», «Вожык» з’яўляецца аналагам польскай сеткі крамаў «Żabka»: «Гэта альтэрнатыва буйным супермаркетам у выглядзе невялікіх магазінаў, у якіх можна купіць самыя патрэбныя тавары побач з домам. Гэтыя невялікія, але цалкам функцыянальныя крамы хутка з’явяцца па ўсёй краіне».
—На рознічным рынку назіраецца павышаны попыт на крамы фармату «каля дому». Беларусы сталі больш цаніць свой час, усё часцей купляюць там, дзе больш зручна і хутка. Мы збіраемся прапанаваць ім асартымент прадуктаў высокай якасці па даступных цэнах і ў прыемнай атмасферы. У гэтым бачым сваю задачу і канкурэнтную перавагу, — паведамілі прадстаўнікі «Вожыка».
