Кацярына Ваданосава запускае ў Беластоку Школу беларускага традыцыйнага строю. Пра гэта яна паведаміла ў сваіх сацыяльных сетках. Набор у групу — да дзесяці чалавек.
Набор у групу школы беларускага традыцыйнага строю ўжо пачаўся. Як кажа сама Кацярына, запісацца можна і жанчынам, і мужчынам. Заняткі пачнуцца ў верасні, яны будуць праходзіць у афлайн-рэжыме. Максімальная колькасць навучэнцаў — дзесяць чалавек.
На занятках будуць вучыцца кроіць і шыць элементы адзення, вышываць рознымі тэхнікамі, ткаць паясы.
— Заняткі будуць платнымі, бо ў мяне няма ні грантаў, ні багатых спонсараў, — падкрэслівае Кацярына. — Бліжэйшым часам аб’яўлю збор на закупку абсталявання для нашай студыі. Можа, знойдуцца добрыя людзі, якія падтрымаюць Школу традыцыйнага строю.
