Фермер з Драгічына Уладзімір Казека вяртаўся з Польшчы ў Беларусь. На мяжы яго затрымалі для асабістай праверкі і папрасілі паказаць тэлефон. Аднак яго ў фермера не было. Пра здарэнне расказвае «Берасцейская вясна».
Сяржант адразу запатрабаваў у Казекі тэлефон. Фермер сказаў, што тэлефона ў яго няма. Той здзівіўся і не паверыў, выклікаў старэйшага па званні, які сказаў, што мужчына сядзе на 15 сутак, калі ў яго знойдуць тэлефон. Уладзімір сказаў: «Шукайце».
Абшукаўшы і не знайшоўшы тэлефона, здзіўленыя работнікі выклікалі падпалкоўніка. Той адразу запатрабаваў выдаць тэлефон «па-добраму», каб не было непрыемнасцяў. Але Уладзімір Казека спакойна адказаў: «Няма. Я іх не накупляюся. У мяне яшчэ ў траўні тэлефон быў канфіскаваны». Праз хвілін 40 фермера адпусцілі.
«Берасцейская вясна» нагадвае, што ў траўні, калі Казека таксама вяртаўся з Польшчы, яго затрымалі за падпіску на «экстрэмісцкія каналы» ў тэлефоне. Тады яго праз суд пакаралі тройчы арыштам на розныя тэрміны. За час адсідак (43 дні запар) загінуў ураджай і зніклі 30 вулляў пчол. Фермер застаўся з доўгам у 10 тыс. долараў.
