Фундацыя INEXKULT запусціла петыцыю, у якой просіць вылучыць памяшканне ў Варшаве, дзе мог бы весці сваю дзейнасць Беларускі тэатр. Новая прастора будзе адкрытая для ўсіх незалежных беларускіх калектываў, піша «Наша Ніва».
Плануецца, што гэта будзе пляцоўка для разнастайных ініцыятыў і дыскусій, месца для сустрэч, імпрэз, адукацыі, навукі і вольнага часу.
«І — калі вы ў Варшаве — варта, можна і трэба падпісаць пэтыцыю ў падтрымку беларускага тэатру. Было б цудоўна мець у Варшаве такі тэатр. Свой», — падзяліўся думкамі пісьменнік Альгерд Бахарэвіч.
Падпісаць петыцыю можна будзе перад усімі спектаклямі INEX ФЭСТ у жніўні, а таксама ў:
- Бары Karma crew Warsaw (Aleja 3 Maja 15, Warszawa)
- BackDoor Bar Warszawa (Chmielna 7/9, Warszawa)
- Teatr Powszechny Warszawa (Jana Zamoyskiego 20)
- Teatr TR Warszawa (Marszałkowska 8)
- Teatr WAM Warszawa (Zgrupowania AK «Kampinos» 15)
Акрамя таго, кожны можа атрымаць бланк і самастойна збіраць подпісы. На гэты час вядома, што петыцыю падпісалі ўжо больш за паўтысячы чалавек. Збор будзе доўжыцца да канца жніўня , а магчыма, працягнецца і ў верасні.
