Анджэй Пачобут, беларускі журналіст Gazeta Wyborcza, які цяпер знаходзіцца ў зняволенні, узнагароджаны медалём 75-годдзя місіі Яна Карскага. 10 верасня ў Любліне ўзнагароду за Анджэя атрымаў яго брат Станіслаў, паведамляе Польскае радыё.
У лютым суд у Гродне асудзіў Пачобута да васьмі гадоў зняволення.
Брат Анджэя Пачобута Станіслаў, які ўжо год знаходзіцца ў Польшчы, падчас цырымоніі сказаў, што верыць у свабоду:
– Я не адчуваю сябе вартым атрымаць гэты медаль, у галаве ўвесь час круцяцца дзіўныя думкі, што Анджэй забраў бы яго лепш. Я не зраблю гэта так добра, як ён, – расчулена сказаў Станіслаў Пачобут. – Надзея заўсёды памірае апошняй, мы верым, што ўрэшце муры абрынуцца і ўсе выйдуць. У Беларусі цяпер больш за 1400 прызнаных палітзняволеных і амаль столькі ж непрызнаных, якія не звярнуліся па дапамогу і не сказалі, за што знаходзяцца ў турме.
Агулам было адчаканена 30 медалёў 75-годдзя місіі Яна Карскага (і выпуску больш не будзе), Пачобут узнагароджаны медалём № 26.
