14 верасня на беларускай мяжы, у пункце пропуску «Брэст», затрымалі былога журналіста Сяргея Гардзіевіча. Ён вяртаўся з Польшчы ў Беларусь. Пра гэта паведаміла Беларуская асацыяцыя журналістаў (БАЖ).
Паводле папярэдніх звестак, у былога журналіста сайта «Першы рэгіён» на мяжы вырашылі праверыць мабільны тэлефон, а пасля затрымалі і змясцілі ў ізялятар часовага ўтрымання ў Брэсце.
БАЖ лічыць верагодным, што Сяргея Гардзіевіча могуць вінаваціць паводле артыкула 19.11 КаАП – «за распаўсюд, выраб, захоўванне, перавозку інфармацыйнай прадукцыі, якая змяшчае заклікі да экстрэмісцкай дзейнасці альбо якая прапагандуе такую дзейнасць». Іншых акалічнасцяў затрымання пакуль няма.
Сяргей Гардзіевіч раней супрацоўнічаў з незалежным інтэрнэт-парталам «Першы рэгіён» і быў карэспандэнтам гэтага сайта ў Драгічыне.
2 жніўня 2021 года суд Іванаўскага раёна прызнаў Сяргея Гардзіевіча вінаватым паводле трох крымінальных артыкулаў: у абразе прадстаўнікоў улады ў сувязі з выкананнем імі службовых абавязкаў (арт. 369 КК), у распаўсюдзе загадзя ілжывых і зневажальных для іншых асоб звестак (паклёп), якія змяшчаюць абвінавачанне ў здзяйсненні цяжкага злачынства (арт. 188 КК), а таксама ў публічнай абразе Лукашэнкі (ч. 1 арт. 368 КК).
Журналіст у судзе сваю віну не прызнаў, але быў пакараны пазбаўленнем волі тэрмінам на 1 год 6 месяцаў у калоніі агульнага рэжыму. Яго прызналі палітвязнем.
Было ўлічана, што пасля затрымання і да суда Сяргея Гардзіевіча некаторы час утрымлівалі пад хатнім арыштам. Большую частку пакарання журналіст адбываў у папраўчай калоніі № 17 у Шклове і выйшаў на волю напрыканцы кастрычніка 2022 года.
