Нацыяналісты ў Гайнаўцы прайшлі маршам па горадзе ў памяць забойцы беларусаў Рамуальда «Бурага» Райса, перадае Wyborcza. Іх рух блакіравалі праціўнікі гераізацыі Райса, якія ўшанавалі памяць ахвяр «Бурага».
19 лютага нацыяналісты правялі ў Гайнаўцы марш у гонар «выклятых жаўнераў». Падчас яго яны ўшанавалі памяць Рамуальда «Бурага» Райса, які забіваў беларусаў па прыкмеце нацыянальнасці і праваслаўнага веравызнання.
У маршы ўдзельнічалі каля сотні чалавек з плакатамі, на якіх былі выявы Райса. Шлях нацыяналістам перакрылі некалькі дзясяткаў чалавек. Яны трымалі ў руках транспаранты: «Забойцы жанчын і дзяцей не салдаты», «Буры» не герой», «Мая радзіма — гэта чалавецтва».
У праціўнікаў марша таксама з сабой былі шыльды з імёнамі забітых жаўнёрамі Райса людзей, а на асфальт паклалі 79 белых руж — столькі было забіта беларусаў. У іх таксама быў бела-чырвона-белы сцяг.
Паліцыя паведаміла, што супраць людзей, якія парушалі закон падчас мерапрыемства, прынялі меры.
Праціўнікі маршу правялі таксама акцыю ў Любліне.
Праціўнікі маршу радыкальных нацыяналістаў не выступаюць агулам супраць усіх удзельнікаў антысавецкага супраціву, якіх у Польшчы называюць «выклятымі жаўнерамі», піша «Радыё Свабода». Ім не падабаецца, што сярод іх згадваюць «Бурага», які адказны за забойствы цывільнага насельніцтва. У 2020 годзе Польская праваслаўная царква ўнесла ахвяр атраду «Бурага» ў спіс святых пакутнікаў Падляскай зямлі. Яшчэ ў 2005 годзе Інстытут нацыянальнай памяці прызнаў забойствы, здзейсненыя аддзелам Рамуальда «Бурага» Райса, злачынствам з прыкметамі генацыду.
Рамуальд Райс, таксама вядомы пад мянушкай «Буры», — польскі афіцэр, камандзір падраздзяленняў Арміі Краёвай у 1945-1946 гадах. У студзені-лютым 1946 года банда Райса здзейсніла масавае забойства 79 беларусаў на Падляшшы паводле этнічнай прыкметы. Райс быў пакараны смерцю за злачынствы супраць мірнага насельніцтва.
