Лаяльны рэжыму Лукашэнкі Саюз палякаў Беларусі напярэдадні парламенцкіх выбараў і рэферэндуму ў Польшчы звярнуўся да польскіх грамадзян. Арганізацыя заклікала іх прагаласаваць за ліквідацыю агароджы на мяжы Беларусі і Польшчы — гэта адно з пытанняў рэферэндуму. Але ў закліку нарабіла шмат памылак, заўважыла выданне Hrodna life.
Адкрыты ліст ад Гродзенскага гарадскога аддзялення ГА «Саюз палякаў на Беларусі» апублікавала «Гродзенская праўда». Яго аўтары хвалююцца за лёс Белавежскай пушчы. На іх думку, агароджа раздзяляе пушчу і не дазваляе ні людзям, ні дзікім жывёлам прайсці з адной краіны ў іншую, а гэта прывядзе да экалагічнай катастрофы.
Ліст выклікае шмат пытанняў. Hrodna life заўважыла, што яго відавочна пісаў чалавек, які не вельмі добра валодае польскай мовай. Магчыма, аўтар карыстаўся дапамогай робатаў-перакладчыкаў кшталту Google Translate ці Яндекс Переводчик. Але яны не надта дапамаглі. Некаторыя памылкі вельмі грубыя.
- Слова «polacy» напісана з малой літары, хаця ўсе нацыянальнасці ў польскай мове пішуцца з вялікай літары: Polacy, Białorusini, Litwini і г. д.
- Аўтар не адрознівае літар «ż» і «ź», хаця гэта зусім розныя гукі – «ж» і «зь» адпаведна.
- Замест слова «naród» у адным месцы выкарыстоўваецца сінонім «lud», які стылістычна і сэнсава не пасуе да сітуацыі.
- У польскай мове два варыянты графічнага запісу гуку «ж» — «ż» і «rz». Аўтар іх блытае.
- Дзеясловы множнага ліку ў мінулым часе ў залежнасці ад роду могуць заканчвацца на «-li» або «-ły». Аўтар іх блытае.
Праўладны Саюз палякаў Беларусі з’явіўся ў 2005 годзе ў выніку расколу ў некалі адзінай арганізацыі. Тады паўстаў незалежны Саюз палякаў, які прызнае афіцыйная Варшава, але не прызнаюць улады ў Мінску. І наадварот — арганізацыя, якая захавала афіцыйную рэгістрацыю ў Беларусі, прызнаецца толькі беларускімі ўладамі і не прызнаецца польскімі.
Вясной 2021 года ключавых кіраўнікоў незалежнага Саюза палякаў у Гродне і рэгіёне арыштавалі. Частку неўзабаве прымусілі выехаць у Польшчу. Старшыня Саюза палякаў Анжаліка Борыс была пераведзена на хатні арышт, а праз два гады, у красавіку 2023 года, з яе знялі абвінавачанні. Адзін з лідараў Саюза палякаў, журналіст Анджэй Пачобут, дагэтуль застаецца ў турме. Яго асудзілі на восем гадоў за нібыта «распальванне варожасці».
