У Варшаве ёсць месца, дзе беларусы могуць правесці мерапрыемствы, папрацаваць ці пазаймацца музыкай. Моладзевы хаб адкрылі яшчэ ў 2020 годзе. MOST і праект «Беларусы могуць» з’ездзілі ў хаб і даведаліся, якія магчымасці ён дае.
Хаб арандуе прыватныя памяшканні, якія належаць польскай сям’і. Арэнда будынка каштуе каля 5 тыс. еўра, але кіраўнік хаба Аляксандр Лапко сцвярджае, што калі звярнуць увагу, колькі актыўнасцяў тут праходзіць, то сума вартая таго, каб яе плаціць.
У хабе ёсць пляцоўка для правядзення мерапрыемстваў, а таксама перамоўная і каворкінг. Сюды можна прыйсці папрацаваць — на сайце ёсць папярэдняя рэгістрацыя. У тых, хто сюды прыходзіць, ёсць магчымасць раздрукаваць файлы, скарыстацца інтэрнэтам, для іх камфорту тут кава і гарбата. Усё гэта бясплатна.
Для журналістаў тут ёсць магчымасць здымаць відэа.
А ўвечары тут займаюцца музыкай: дзейнічаюць танцавальна-музыкальны гурт і харэаграфічная школа для дзяцей.
— Хаб павінен быць домам адукацыі, домам грамадзянская актыўнасці, падтрымкі культурніцкіх мерапрыемстваў і дзеячаў, — кажа Аляксандр Лапко.
