Прадстаўнік КДБ Беларусі Канстанцін Бычак падключыўся да анлайн-занятку Вольнага Беларускага Універсітэта (ВБУ). Інцыдэнт адбыўся ўвечары 19 снежня.
«Сярод 19 слухачоў з’явілася непажаданая асоба, якая злоўжыла доступам да сесіі ў ЗУМе і запусціла правакацыйны відэа-зварот ад імя прадстаўніка спецслужбаў Беларусі, ганебны па зместу і неадэкватны па форме. У гэтай сувязі занятак быў спынены», — паведамілі ў БВУ.
Па інфармацыі «Белсата», ён паведаміў удзельнікам, што «ўсе пад кантролем».
Універсітэт патлумачыў, што абвяшчае наборы адкрыта і запрашае ўсіх ахвотных беларусаў далучацца на конкурснай аснове да абраных курсаў. А спасылку на занятак, верагодна, мог атрымаць нават той, хто не быў студэнтам.
Зважаючы на сітуацыю, універсітэт стварыў умовы для захавання ананімнасці ўдзельнікаў курсаў. Рэгламент прадугледжвае, што калі нехта зацікаўлены ў захаванні сваёй ананімнасці, на занятках можна не ўключаць камеру, а таксама замяніць сапраўднае імя і прозвішча на нік у наладах Zoom. Але ў такім выпадку ўніверсітэт папрасіў выкарыстоўваць e-mail, пазначаны ў заяўцы, каб можна было верыфікаваць кандыдата і пацвердзіць яго рэгістрацыю.
«Дэманстрацыйныя спробы спецслужбістаў нібы “ўламацца” ў наш адкрыты акадэмічны працэс не маюць сэнсу, а іх дзеянні не маюць нічога агульнага з абаронай нацыянальнай бяспекі», — адзначаецца ў заяве ВБУ.
ВБУ не прызнаны экстрэмісцкім фармаваннем, нагадвае «Белсат». ВБУ выконвае ролю аператара адаптаваных для Беларусі праграм, ствараемых і рэалізуемых разам з заходнімі партнёрскімі ўніверсітэтамі.
Раней Бычак падключыўся таксама да семінара па бяспецы Беларускага моладзевага хаба. Яго арганізоўваў актывіст Алег Аксёнаў.
