З бел-чырвона-белым сцягам у Польшчы можна сустрэць не толькі беларусаў. Еўрарадыё расказвае, хто яшчэ выкарыстоўвае такі сцяг, а таксама чаму і калі з беларускім БЧБ могуць узнікнуць праблемы.
У польскім горадзе Лодзь ёсць футбольны клуб ŁKS (Łódzki Klub Sportowy S.A). Так гістарычна склалася, што колеры каманды — белы і чырвоны. Больш за тое, сцяг клуба — бел-чырвона-белы. Яго прапорцыі толькі трошкі адрозніваюцца ад беларускага нацыянальнага сцяга, але ў астатнім ён выглядае амаль ідэнтычна.
«Прыехаў у Лодзь, сустрэў палякаў. Думаў, беларусы, але аказалaся, што фанаты ŁKS — клуб футбольны іх з такім жа сцягам. Думаю, не першы тут з такой гісторыяй», — піша ўдзельнік чата беларусаў у Лодзі.
Гісторый ад беларусаў сапраўды хапае, але не ўсе з іх пазітыўныя:
«Як толькі пераехалі [у Лодзь] і засяліліся ў новую кватэру, вывесілі наш сцяг у акно. Вісеў некалькі месяцаў. Суседзі ўвесь гэты час неяк скоса на нас паглядалі. А потым уласніца кватэры папрасіла зняць, каб нам вокны не пабілі…»
У чым праблема?
Рэч у тым, што ў гэтым польскім горадзе ёсць яшчэ адзін клуб — Widzew Łódź. Абедзве каманды гуляюць у «Экстралізе» (польскі аналаг беларускай Вышэйшай лігі).
Як гэта часцей за ўсё бывае, клубнае супрацьстаянне выходзіць за межы футбольнага поля. «Дэрбі» адбываецца і сярод фанатаў — заўзятары гэтых каманд ненавідзяць адно аднаго.
Лодзь негалосна падзеленая паміж фанатамі: ёсць раёны ŁKS і ёсць раёны «Відзэва».
«Калі фанаты каля стадыёна спакойныя, то гэта зусім не значыць, што калі яны ідуць у звычайны вечар па “сваім” раёне і бачаць кагосьці з сімволікай “чужой” каманды, то нічога не адбудзецца. У мяне ёсць не адзін жывы прыклад канфліктаў кшталту: “У цябе бірулька ад ключоў ŁKS. Ідзі сюды, пагаворым”», — піша яшчэ адзін карыстальнік.
На шчасце, гісторый пра збіццё беларусаў за БЧБ у мясцовым чаце Еўрарадыё не знайшло. Тамсама пішуць, што ўсе канфліктныя сітуацыі ўдаецца вырашыць з дапамогай дыпламатыі. Аднак новым беларусам у Лодзі ўсё адно раяць не свяціць «варожымі колерамі» ў раёнах фанатаў «Відзэва». На ўсялякі выпадак.
Дарэчы, сцяг «Відзэва» — чырвона-бела-чырвоны. Шпацыр па Лодзі са сцягам Латвіі тэарэтычна таксама можа скончыцца канфліктам, аднак ужо з фанатамі ŁKS. Майце на ўвазе!
У інтэрнэце нават можна знайці неафіцыйную карту падзелу Лодзі на зоны ўплыву фанацкіх груповак. Паводле яе, заходняя частка горада «належыць» бел-чырвона-белым, усходняя — чырвона-бела-чырвоным.
![карта Лодзи](https://mostmedia.io/wp-content/uploads/2024/02/karta-5_result.webp)
Не забудзь падпісацца на MOST у Тэлеграм. Мы галоўнае медыя беларусаў у Польшчы.