У Варшаве адбылася прэзентацыя стужкі «Дух месца», якую стварылі былыя акцёры Купалаўскага тэатра. Кароткаметражка здымалася ў варшаўскім бары Scena Chmielna, паведамляе Радыё Свабода.
У аснову фільма лягло апавяданне Зміцера Дзядзенкі «Тры магілы Арыка Фергаса». Сяргей, галоўны герой твора, прыязджае ў беларускі гарадок. Там ён сутыкаецца з чалавекам, які праявіў сябе як герой у розныя гістарычныя часы.
Працягласць кароткаметражкі — 18 хвілін, а саму стужку стваральнікі называюць камернай.
— Нам хацелася зрабіць такую калабарацыю тэатра і кіно: аўдыёкніга з ілюстрацыямі на тэатральнай сцэне, — адзначыў рэжысёр і сцэнарыст Павел Яскевіч.
«Купалаўцы» сцвярджаюць, што гэта была першая спроба стварыць кіно сваімі сіламі — стужка была знятая на энтузіязме, а ў здымачнай групы не было фінансавання, людзі дапамагалі «за ідэю». Напрыклад, мастачка па грыме прыехала з Чэхіі, каб дапамагчы камандзе.
— А потым прыйшла ідэя зрабіць гэта… па-дурному. Такі эксперымент. Калі нам дапамаглі з аператарам, знайшлі пляцоўку, мы вырашылі: а чаму б нам не паспрабаваць зрабіць фільм з дапамогай скотчу і таленту? — адзначае Павел Яскевіч.
Стваральнікі стужкі вызначылі яе жанр як «эмбіентная камедыя».
— Эмбіент — гэта асяроддзе, наваколле. Гэта такі стыль электроннай музыкі, эмбіент — ён характарызуецца атмасферным, ахінальным, ненадакучлівым гучаннем. І мне здаецца, у нас атрымалася такое ненадакучлівае кіно. Калі камедыя, то гэта як працуе? Усе павінны весяліцца тут і цяпер. А эмбіентная камедыя — гэта калі вы праз тыдзень будзеце сумнымі, прыгадаеце наш фільм — і на твары з’явіцца добрая ўсмешка, — распавядае Павел Яскевіч.
У фільме здымаліся Алег Гарбуз, Яўгенія Кульбачная, Сяргей Чуб і Андрэй Дробыш.
