МЗС Польшчы рашуча асудзіла правядзенне парламенцкіх выбараў у Беларусі ва ўмовах крайняга невыканання дэмакратычных працэдур.
У заяве міністэрства падкрэсліваецца, што галасаванне, арганізаванае беларускімі ўладамі, было чарговай спробай стварыць альтэрнатыўную рэчаіснасць, паглыбіць унутраны крызіс і захаваць уладу любой цаной за кошт уласнага грамадства.
— Мы расчараваныя рашэннем Мінска ператварыць нядзельныя выбары ў фарс і пародыю на дэмакратыю і выкарыстоўваць іх для прасоўвання шкоднай палітыкі падпарадкавання беларускага народа волі вузкай групы, якая мае ўладу.
МЗС Польшчы ў чарговы раз нагадала пра палітвязняў, адзначыўшы, што Беларусь па-ранейшаму застаецца непрыязнай краінай для саміх беларусаў.
— У беларускіх калоніях па-ранейшаму ўтрымліваюцца некалькі тысяч палітычных апанентаў улады, у тым ліку прадстаўнікі польскай нацыянальнай меншасці. У палітычных працэсах па абсурдных абвінавачаннях выносяцца выракі да шматгадовага пазбаўлення волі нават за найменшае праяўленне незалежнасці, у тым ліку за крытыку ўлады. Вязням адмаўляюць у базавых правах, яны ўтрымліваюцца ў цяжкіх умовах і падвяргаюцца бесчалавечнаму і зневажальнаму абыходжанню, — канстатуе МЗС.
У заяве адзначаецца, што Польшча ўвесь час заклікае ўлады Мінска выконваць свае міжнародныя абавязкі, вызваліць і рэабілітаваць усіх палітычных зняволеных, а таксама правесці маштабную ўнутраную інстытуцыйную рэформу, якая ператворыць Беларусь у свабодную, дэмакратычную і адказную еўрапейскую дзяржаву, якая паважае правы і клапоціцца пра дабрабыт сваіх грамадзян.
— Беларускі народ гэтага заслугоўвае, — сцвярджаецца ў заяве.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
