У сераду, 6 сакавіка, у Варшаве пройдзе марш «Яе звалі Ліза» ў памяць пра забітую і згвалтаваную беларуску. Арганізатары плануюць пачаць ад месца злачынства — вул. Żurawia 47.
Сярод арганізатараў — дабрачынная арганізацыя Fundacja Kraina, якая дапамагае ўцекачам, і арганізацыя ўкраінскіх жанчын Sema Ukraine. Яны выйдуць пад лозунгам «Хопіць гвалтаваць» у памяць Лізы і ўсіх жанчын, якія падвергліся сэксуалізаванаму гвалту.
«Яе звалі Ліза, ёй было 25 гадоў, у яе былі карыя вочы і талент да стварэння капелюшоў. Яна прыехала жыць у Польшчу з-за небяспекі ў Беларусі. Мы ўжо не даведаемся, пра што яна марыла і што планавала — уначы, у цэнтры Варшавы, у элітным раёне, яе жорстка згвалтавалі і забілі. Ніхто не адрэагаваў, ніхто не патэлефанаваў у службу 112», — пішуць арганізатары.
Яны сцвярджаюць, што тое, што здарылася з Лізай, магло адбыцца з любой з жанчын.
«Мы выходзім на вуліцы, каб Ліза не была забытая. Каб вуліцы нарэшце сталі бяспечнымі для нас. Мы зноў і зноў заяўляем: каб гвалт знік, трэба перастаць гвалціць. Мы звяртаемся да мужчын: вы таксама можаце мяняць сітуацыю сваёй гучнай пазіцыяй супраць гвалту і сваёй падтрымкай жанчын. Мы стаміліся жыць у небяспецы і страху перад сэксуалізаваным гвалтам», — пішуць арганізатары.
Плануецца, што марш пройдзе ў цішыні, бо «трагедыя Лізы адбылася ў цішыні».
«Большасць жанчын падчас згвалтавання не крычаць — у выніку дысацыяцыі, адмаўлення або несвядомага стану. Маўчанне не азначае згоды. Яно можа быць крыкам аб дапамозе».
Не забудзь падпісацца на MOST у Тэлеграм. Мы галоўнае медыя беларусаў у Польшчы.
