Дырэктарку «Белсата» Агнешку Рамашэўскую-Гузы звольнілі пасля 17 гадоў працы. Пра звальненне яна паведаміла на сваёй старонцы ў Фэйсбуку. Галоўнае з яе паста пераказала «Наша Ніва».
Паводле ўжо былой дырэктаркі, яе звольнілі пасля 17 гадоў працы на «Белсаце» і 32 гадоў працы на Польскім тэлебачанні TVP. Пры гэтым ёй, па яе словах, спярша прапанавалі звольніцца па ўласным жаданні і «з залатым парашутам», то-бок на вельмі добрых умовах, але жанчына на гэта не пагадзілася.
Што да будучыні «Белсата», то ягоны бюджэт, па словах Агнешкі Рамашэўскай-Гузы, будзе па рашэнні МЗС зменшаны на 47%, а рускамоўныя праграмы з канала будуць перададзеныя каналу TVP World. Былая дырэктарка «Белсата» лічыць гэта памылкай, бо справа прасоўвання праўдзівай інфармацыі на ўсход ад гэтага, на яе думку, страціць.
Як паведамляе «Белсат», кіраўніцтва каналам возьме на сябе намеснік Рамашэўскай-Гузы і адзін з заснавальнікаў станцыі Аляксей Дзікавіцкі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
