Старшыня непрызнанага беларускімі ўладамі Саюза палякаў Анжаліка Борыс са згоды Лукашэнкі сустракалася ў Наваполацкай калоніі з палітвязнем Анджэем Пачобутам. Пра гэта яна распавяла на сустрэчы прадстаўнікоў Саюза палякаў Беларусі з прэзідэнтам Польшчы Анджэем Дудам, паведамляе ягоная прэс-служба.
Калі адбылася сустрэча ў калоніі, не паведамляецца.
Анджэй Пачобут быў затрыманы 25 сакавіка 2021 года ў сваім доме ў Гродне пасля ператрусу. І з тых часоў застаецца ў зняволенні. Беларуская пракуратура абвінаваціла гродзенскага журналіста ў распальванні нацыянальнай варожасці, рэабілітацыі нацызму і закліках да санкцый. 8 лютага 2023 года палітзняволенаму Анджэю Пачобуту далі 8 гадоў калоніі.
Анжаліка Борыс была затрыманая ў сакавіку 2021 года, супраць яе завялі крымінальную справу за распальванне нянавісці. Праз год яе перавялі пад хатні арышт, а ў красавіку 2023 года справу закрылі за адсутнасцю складу злачынства.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
