8 траўня ў Польшчы пасля працяглай хваробы памёр 51-гадовы беларус Зміцер Барэйчук. BYSOL адкрыў збор сродкаў на пахаванне, а таксама для падтрымкі яго сям’і: у Зміцера засталася жонка і чацвёра дзяцей.
На старонцы збору паведамляецца, што ў 2020 годзе Зміцер быў у камандзе Віктара Бабарыкі. Ён ездзіў па Беларусі і збіраў подпісы. Мужчына ўвайшоў у пяцёрку найбольш эфектыўных зборшчыкаў. За гэта яго арыштавалі і пасадзілі на суткі.
Пасля гэтага сям’ю Змітра больш не пакідалі ў спакоі. У іх дома было некалькі ператрусаў. А ў лістападзе 2022 года пасля чарговага пераварочвання кватэры мужчыну затрымалі і даставілі на Акрэсціна для «разбіральніцтва».
З камеры Зміцер выйшаў падазраваным паводле дзвюх крымінальных спраў і са скаргамі на болі ў жываце. Мужчыну шпіталізавалі, і ў жніўні 2023 года ў РНПЦ анкалогіі імя Аляксандрава яму быў пастаўлены дыягназ: суцэльна-кістозная пухліна, і паказаная аперацыя па яе выдаленні як мага хутчэй.
Паколькі на той момант да заканчэння дзеяння візы заставалася толькі некалькі дзён, на сямейнай радзе Зміцер і яго блізкія вырашылі пакінуць краіну. Аперацыю па выдаленні пухліны разам з часткай кішэчніка мужчыну зрабілі ўжо ў Беластоку.
Прагнозы былі добрыя, яму нават збіралі сродкі на рэабілітацыю. Але хвароба ўзяла сваё.
У мужчыны засталося чацвёра дзяцей. Старэйшаму з іх 18 гадоў, малодшай дачцэ — 13.
