Кіраўнік украінскага горада Луцка Ігар Палішчук запісаў зварот да жыхароў Брэста і беларусаў.
Палішчук нагадаў пра 20-гадовае супрацоўніцтва Луцка і Брэста, а таксама пра культурніцкія і спартыўныя стасункі.
Кіраўнік Луцка адзначыў, што ва Украіне ідзе вайна, якую пачала Расія.
— Агрэсар у асобе Расійскай Федэрацыі абстрэльвае нашы гарады і вёскі, знішчае інфраструктуру гарадоў і нашу прамысловасць. Гінуць тысячы нявінных мірных жыхароў, сярод якіх — пажылыя людзі, жанчыны, дзеці. Гінуць нашы вайскоўцы.
Ігар Палішчук падкрэсліў, што ва Узброеных сіл Украіны ёсць інфармацыя пра 38 асобную дэсантна-штурмавую брыгаду Узброеных Сіл Рэспублікі Беларусь, якая дыслацыруецца ў Брэсце. Па яго словах, брыгада атрымала загад аб уварванні на тэрыторыю Украіны.
— Ніхто не абавязаны выконваць злачынныя загады. Сёння няма ніводнай падставы для ўварвання Узброеных Сіл Рэспублікі Беларусь на тэрыторыю Украіны. Заклікаем Вас падумаць пра сваю будучыню, будучыню сваіх дзяцей, жонак, сваякоў. Падумайце пра сваіх блізкіх. Звяртаемся да вас з вялікай просьбай не стаць рускімі наймітамі.
Луцкі гарадскі кіраўнік звярнуўся і да ўсіх беларусаў, якіх прасіў супрацьстаяць вайне і не дапусціць уварвання беларускіх войск ва Украіну.
