Дэмакратычная лідарка Святлана Ціханоўская падчас візіту ў Варшаву абмяркуе пытанні легалізацыі беларусаў у Польшчы з прадстаўнікамі Міністэрства ўнутраных спраў краіны.
— Я спадзяюся, што па выніках нашай сустрэчы ў міністэрстве працягне працу рабочая група па пытаннях легалізацыі беларусаў і мы зможам знайсці разумныя рашэнні, каб беларусаў не абмяжоўвалі пры перасячэнні мяжы, а ўсе санкцыі былі накіраваныя найперш на рэжым Лукашэнкі, а не на простых грамадзян Беларусі. Сярод іншага падчас сустрэч мы абмяркуем выдачу віз, спрашчэнне ўмоў для адкрыцця банкаўскіх рахункаў беларусаў, — прыводзіць яе словы Аб’яднаны пераходны кабінет (АПК).
Ціханоўская таксама сказала, што ўдзячная польскім уладам за рашучасць, асабліва ў справе вызвалення палітзняволеных.
— Гэта наш абсалютны прыярытэт. Мы вітаем вызваленне некалькіх палітвязняў, у прыватнасці Рыгора Кастусёва, і дамагаемся, каб былі вызваленыя ўсе, у першую чаргу тыя, хто знаходзіцца ў крытычным стане па здароўі, — адзначыла яна.
Падчас візіту прадстаўнікі АПК плануюць таксама абмеркаваць стратэгію дзеянняў на 2025 год, калі павінны адбыцца прэзідэнцкія выбары ў Беларусі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
