У польскія школы ў 2023/24 навучальным годзе хадзілі 32 тыс. вучняў-грамадзян Беларусі, паведаміла польскаму агенцтву PAP Паўліна Храстоўска з Цэнтра грамадзянскай адукацыі. Гэта другая па велічыні група замежнікаў пасля ўкраінцаў.
З даследавання Цэнтра грамадзянскай адукацыі вынікае, што ў мінулым навучальным годзе да польскіх школ хадзіла 290 тыс. украінцаў, з якіх 188 тыс. прыбылі ў Польшчу пасля пачатку вайны. Акрамя таго, дагэтуль дзясяткі тысяч украінскіх дзяцей, якія жывуць у Польшчы, вучыліся анлайн ва ўкраінскіх школах або не вучыліся ўвогуле. Паводле новых нормаў заканадаўства, дапамогу 800+ на дзяцей школьнага ўзросту змогуць атрымліваць толькі тыя бацькі, дзеці якіх навучаюцца ў польскіх школах. Таму чакаецца, што ў 2024/25 годзе ў школы прыйдзе яшчэ ад 20 да 60 тыс. украінцаў.
У польскіх школах вучыцца таксама 4,6 тыс. расіян, 2,4 тыс. в’етнамцаў, 1,8 тыс. індыйцаў, 1,4 тыс. грузін, 1 тыс. малдаван. Замежнікі складаюць 7% ад агульнай колькасці вучняў польскіх школ.
Паводле Паўліны Храстоўскай, настаўнікі называюць моўны бар’ер галоўнай праблемай у адукацыі вучняў-замежнікаў. Экспертка звярнула ўвагу на тое, што «існуе мова камунікацыі, якой дзеці хутка авалодваюць, знаходзячыся ў Польшчы, могуць паразумецца ў штодзённых справах з аднагодкамі». Цяжэй замежнікам з мовай адукацыі, то-бок такім узроўнем польскай мовы, які дазваляе дзецям вучыцца хіміі, фізіцы, матэматыцы.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
