Журналіст Дзяніс Івашын ужо больш за год знаходзіцца за кратамі, амаль палову тэрміну яму не прыходзяць лісты.
Жонка Дзяніса Івашына Вольга расказвае, што ён адчувае сябе фізічна і маральна нармальна.
— Апошнім часам узнікла трошкі дробных побытавых непрыемнасцяў, але ўсе праблемы нязначныя і вырашальныя. Працуем над гэтым, — тлумачыць Вольга.
Вядома, што Івашыну працягнулі тэрмін знаходжання пад вартай на два месяцы. Як мінімум да мая журналіст будзе ў гродзенскім СІЗА.
Журналіст Дзяніс Івашын знаходзіцца за кратамі з 12 сакавіка 2021 года. Яго абвінавачваюць па двух артыкулах Крымінальнага кодэкса — «умяшанне ў дзейнасць супрацоўніка органаў унутраных спраў» (артыкул 365) і «здрада дзяржаве» (артыкул 356). Праваабарончая супольнасць Беларусі прызнала Дзяніса Івашына палітвязнем.
