У Беластоку працуе бясплатны заапарк. У яго можа прыйсці любы ахвотны і пабачыць шэраг абсалютна розных птушак і жывёл — ад качак з бусламі да мядзведзя з зубром.
Заапарк месціцца ў зялёнай зоне Беластока, у парку Канстытуцыі 3-га Мая. Установа працуе кожны дзень ад 8 да 18 гадзін. Уваход бясплатны.
Супрацоўнікі просяць не карміць жывёл і не залазіць да іх у вальеры, а таксама не катацца па тэрыторыі парка на роварах. У парку два ўваходы, перад кожным з іх ёсць дошкі з інфармацыяй пра заапарк і жывёл, якія там жывуць. А перад кожным вальерам стаіць адмысловая шыльда з кароткай інфармацыяй пра канкрэтную жывёлу, яе арэал пражывання.
У заапарку шмат птушак. Буслы прылятаюць гнездавацца напрыканцы сакавіка, а качкі плаваюць у сажалцы круглы год. Дарэчы, сажалка зарыблена. У адмысловых вальерах сядзяць шэрая кугакаўка (птушка з атраду савіных) і канюк звычайны.
Таксама ў заапарку ёсць вялікія вальеры з лясным катом і рыссю, ваўкамі.
У некаторых вальерах можна пабачыць свойскіх жывёл: курэй, свіней, трусоў.
Больш за ўсё ў заапарку парнакапытных: высакародныя алені, поні, коні, аслы, лані.
У заапарку можна ўбачыць буйных жывёл: зубра і мядзведзя.
