Фанаты мінскага «Дынама», верагодна, плануюць акцыю падчас матчу клуба з варшаўскай «Легіяй», запланаванага на 7 лістапада ў польскай сталіцы. Такую выснову можна зрабіць з паведамлення, апублікаванага акаўнтам фанатаў. Яны заклікалі сабрацца на стадыёне і «нагадаць свету пра тое, што адбываецца з Беларуссю».
«Гэты матч — лепшая магчымасць нагадаць свету пра тое, што адбываецца з Беларуссю, у Беларусі… У звязку з гэтым аб’яўляецца агульны збор на гульню! Усе адэкватныя і здравыя Беларусы павінны выказацца! З мэтай бяспекі пакуль не можам расказаць усе планы і мерапрыемствы. Але адно ўжо можна сказаць дакладна: купляйце квіткі на стадыён (на кожны сектар, на кожныя месцы), бярыце як мага больш сцягоў і атрыбутыкі НАШЫХ колераў, і не забывайце пра прыватнасць (каптуры, цёмныя акуляры, маскі/шалі і г. д.)! Усе далейшыя інструкцыі вы атрымаеце напярэдадні і ў дзень матчу», — паведамляе акаўнт фанатаў мінскага «Дынама».
На матч прададзена амаль 22 тыс. білетаў. Усяго варшаўская арэна месціць 31 тыс. гледачоў.
«Нешта будзе»
Беларускі спецыяліст Сяргей Гурэнка падзяліўся чаканнямі ад матчу асноўнага раўнда Лігі канферэнцый.
— Будзе нейкая палітычная падаплёка. Як бы мы ні хацелі, каб спорт быў па-за палітыкай, але нешта будзе. Галоўнае, каб не было правакацый. «Легія» вышэй па ўзроўні. Учапіць пункты, у тэорыі, можна, але ў «Легіі» заўсёды былі добрыя легіянеры.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
