Пасольства Украіны ў Польшчы праводзіць перамовы з урадам гэтай краіны аб поўным закрыцці мяжы з Беларуссю, нават калі такое рашэнне не будзе ўхваленае на ўзроўні ЕС. Аб гэтым паведамляе Укрінформ.
Пра гэта заявіў пасол Украіны ў Польшчы Андрэй Дзяшчыца:
— Мы вядзем перамовы з Міністэрствам інфраструктуры, з польскім урадам, каб цалкам закрыць мяжу паміж Польшчай і Беларуссю — нават калі рашэнне будзе прынятае не на ўзроўні ЕС.
Украінскія дыпламаты вядуць перамовы таксама з іншымі краінамі, дадаў Дзяшчыца. Гэта Літва, Латвія і Эстонія. Дзяшчыца падкрэсліў, што паслы звярнуліся да гэтых краін з просьбай закрыць межы адначасова з Беларуссю і Расіяй. Па меркаванні пасла, калі такія рашэнні будуць прынятыя, то Украіне не давядзецца чакаць рашэння ад Еўракамісіі.
Нагадаем, 25 сакавіка ўкраінскае Міністэрства інфраструктуры накіравала ліст у Еўракамісію з просьбай закрыць транспартныя зносіны з Расіяй і Беларуссю.
