Цэнтр маніторынгу расісцкіх і ксенафобскіх паводзін паведаміў, што пракуратура ў Беластоку не будзе далей расследаваць справу аб прычыненні шкоды бежанцам на польска-беларускай мяжы. Аб гэтым паведамляе Gazeta Wyborcza.
Цэнтр маніторынгу падаў восенню 2021 года позву, у якой патрабавалі распачаць крымінальную справу за практыку польскіх памежнікаў высылкі нелегальных мігрантаў да польска-беларускай мяжы, за незаконныя «пушбэкі».
Арганізацыя падкрэслівае, што ў позве былі ўказаныя канкрэтныя выпадкі, калі польскія памежнікі перавозілі нелегальных мігрантаў у грузавіках да мяжы з Беларуссю. У грузавіках былі дзеці. Прадстаўнікі Цэнтра маніторынгу лічаць, што польскія службы стварылі небяспеку для дзяцей, а іх дзеянні можа класіфікаваць яшчэ як і расавую сегрэгацыю.
Па словах прадстаўнікоў Цэнтра, пракуратура не апытала пацярпелых, сведак і меркаваных злачынцаў:
— Пракуратура ў Беластоку вырашыла, што вывозіць галодных і прамёрзлых дзяцей, жанчын і мужчын на балоты, а затым прымушаць іх незаконна перасякаць мяжу, збіваючы нагамі і пужаючы сабакамі, — гэта не злачынства. На думку пракурораў Беластока, малых дзяцей і цяжарных жанчын можна падвергнуць непасрэднай смяротнай небяспецы: прывезці ў лес зімой і кінуць іх сярод ночы на волю лёсу.
Прадстаўнікі Цэнтра падалі скаргу на рашэнне пракуратуры.
