Пасля пачатку расійскай агрэсіі ва Украіне ў сеціве з’яўляецца ўсё больш гісторый пра дыскрымінацыю беларусаў у Польшчы. Польскі Цэнтр маніторынгу расісцкіх і ксенафобскіх выказванняў вядзе некалькі спраў аб дыскрымінацыі беларусаў. 2 красавіка Цэнтр напісаў у сваіх сацыяльных сетках аб гэтых справах, а MOST сабраў для вас некалькі каментарыяў ад палякаў: што яны думаюць наконт пераследу беларусаў у сваёй краіне.
MOST пагартаў стужку з каментарыямі, якія пакінулі палякі пад допісам Цэнтра. Дзелімся з вамі, як яны рэагуюць на навіны аб дыскрымінацыі беларусаў.
Самы залайканы каментарый пакінуў карыстальнік Коза Лукаш, у якім захапляецца беларусамі і іх барацьбой:
— Беларусы — вялікая нацыя, якая ў 2020 годзе спрабавала зрынуць Лукашэнку. Я веру, што калі-небудзь яны будуць свабоднымі ад кантролю дыктатара.
Адзін з самых упадабаных каментарыяў пакінуў карыстальнік з нікам Ёанна Залеска: «Я б таксама не хацела, каб мяне судзілі за мяжой за “дасягненні” ПіС».
Бурную рэакцыю выклікаў допіс ад Міхала Чарноўскага: «Гэта значыць, што калі беларус ці рускі падтрымлівае Лукашэнку ці Пуціна, то гэта беее, а тыя беларусы ці рускія, якія падтрымліваюць Захад, — гэта ок? Ну добра. З аднаго боку Пуцін атакуе Расію, з іншага — ЗША і НАТА, якія сваімі ўварваннямі забілі сотні, калі не тысячы людзей у Іраку, Югаславіі або Афганістане. А дзе гэтае асноўнае права чалавека пад назвай “свабода рабіць свабодныя выбары”? Я так разумею, што заходняя прапаганда і яе каштоўнасці — толькі яны правільныя? Хіба гэта не дыскрымінацыя?».
Карыстальнік з імем Дар’я Баркоўска абураецца, што не бачыць у інтэрнэце беларусаў з іх сцягам (маецца на ўвазе бел-чырвона-белым) — пра гэта, яна лічыць, пішацца мала гісторый, як і пра «пані прэзідэнтку» і дыскрымінацыю з боку Лукашэнкі. Гэта, піша Баркоўска, з-за недахопу ведаў можа нанесці шкоду нявінным людзям.
