Беларуская журналістка Марыя Грыц стварыла петыцыю да платформы Amazon Kindle Direct Publishing (KDP), якая дазваляе самастойна замаўляць друк кніг. Яна просіць дадаць магчымасць публікаваць кнігі па-беларуску. Зараз у спісе даступных моў ёсць нават каталонская і фарэрская, а беларускай няма. Петыцыя з’явілася на сайце Change.org і прымеркаваная да Дня роднай мовы.
Аўтарка петыцыі лічыць магчымасць друкаваць кнігі на амерыканскай платформе добрым унёскам у будучыню роднай мовы.
— Зразумела, што выданне кнігі — гэта вялікая праца, для якой патрэбны цэлы шэраг людзей: карэктар, рэдактар, дызайнер і так далей. А Аmazon дае нешта накшталт канструктара: ты можаш самастойна скласці, як будзе выглядаць твая кніга, якія туды малюнкі дадаць, якую вокладку зрабіць. Мы просім карпарацыю разблакаваць беларускую мову на платформе і дадаць яе ў шэраг даступных для выдавецтва, — патлумачыла Марыя Грыц MOST.
Яна просіць падтрымаць петыцыю. На думку аўтаркі праекта, у беларускай супольнасці такім чынам з’явіцца магчымасць друкаваць і чытаць кнігі на роднай мове. На момант публікацыі гэтага матэрыялу петыцыя сабрала каля 340 подпісаў.
— Якім чынам Amazon дадае мовы да KDP — таямніца, таму што там ёсць розныя мовы. Напрыклад, мова Фарэрскіх астравоў. Носьбіты гэтай мовы, дарэчы, адны з лідараў у Еўропе па колькасці кніг на душу насельніцтва. Хаця там усяго 80 тыс., падаецца. Ці, напрыклад, носьбіты каталонскай мовы. Іх прыкладна 9 млн, і яны змагаюцца за сваю ідэнтычнасць як ільвы. І гэта вельмі натхняе.
«Amazon, нам таксама патрэбныя буквары, маляванкі, зборнікі вершаў і нават “Гульня тронаў” па-беларуску!» — напісана ў петыцыі.
Як далучыцца да флэшмобу #BezosGiveMeMyBook?
Петыцыю падтрымалі некаторыя арганізацыі і даслалі ў амерыканскую карпарацыю афіцыйныя лісты. Сярод іх ПЭН-цэнтр, Беларуская асацыяцыя журналістаў, Рада Культуры.
— Я спадзяюся, што ў нас атрымаецца не толькі грамадзянская акцыя, але і акцыя на адміністрацыйным узроўні, — кажа Марыя.
Журналістка прапануе не толькі падпісаць петыцыю, але і распавесці пра яе ў сацсетках. Так можна паўдзельнічаць у флэшмобе #BezosGiveMeMyBook.
— Тэгнуць Амазон, каб яны дакладна пабачылі. У інстаграме тэгаць @AmazonKDP, у фэйсбуку — @KindleDirectPublishing, у твітары — @AmazonKDP. Таксама перадаць эстафету тром сябрам, якія любяць беларускую мову і падзяляюць твае каштоўнасці. Да публікацыі дабавіць хэштэгі акцыі: #BezosGiveMeMyBook #ДзеньРоднайМовы.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
