Гродзенскага музыку Ігара Банцара будуць судзіць за няплату камуналкі на «хіміі» ўжо 11 красавіка. Пра дату пачатка судовага працэсу Банцар расказаў на сваёй старонцы ў Facebook.
Ігара Банцара пачнуць судзіць 11 красавіка. Мужчыну абвінавачваюць у няплаце камунальных плацяжоў за спецінтэрнат, у якім ён жыў падчас адбыцця пакарання.
Згодна з абвінавачваннем, Банцар не аплаціў камуналку за шэсць месяцаў. Запазычанасць склала 86 рублёў, пракурор яшчэ просіць аплаціць дзяржаўную пошліну ў памеры 64 рублёў.
Музыка з позвай не згодны. Ён пракаментаваў «Белсату», што адсядзеў у штрафным ізалятары агулам амаль тры месяцы і яго фізічна не было ў інтэрнаце, таму ён адмаўляецца аплачваць камуналку.
Рок-музыку Ігара Банцара асудзілі да года і шасці месяцаў «хіміі» ў сакавіку 2021 года. Мужчыну абвінавачвалі ў хуліганстве — ён станцаваў без штаноў перад міліцэйскім аўтамабілем. Па словах Банцара, ён праз перформанс (танец у стрынгах) выказваў свой пратэст. Музыка выйшаў на волю ў снежні 2021 года.
