У Польшчы абіраюць асобу года. Конкурс праводзіць медыягрупа Polska Press. У намінацыі «Культура» ёсць і беларуска Вольга Пашковіч, якая робіць этнічных лялек, заўважыў «Белсат».
Беларуска намінаваная за самую вялікую калекцыю этнічных лялек (100 беларускіх, польскіх, украінскіх і рускіх лялек) уласнага аўтарства, а таксама за правядзенне майстар-класаў арт-тэрапіі і этнаграфіі як для эмігрантаў, гэтак і для палякаў.
«Яшчэ ў Беларусі я захапілася лялькамі-мотанкамі. У працэсе напісання дысертацыі пра турызм у Беларусі вывучала беларускія традыцыі і рамёствы. Я сабрала велізарную колькасць матэрыялу на гэтую тэму. Прыехаўшы ў Польшчу тры гады таму, пастанавіла візуалізаваць усе сабраныя раней матэрыялы пра лялькі. Так з’явілася мая калекцыя, што налічвае ўжо амаль 100 экзэмпляраў. Гэтая калекцыя была выстаўленая летась. За год калекцыя павялічылася на чвэрць. Я планую арганізаваць выставу з больш глабальным ахопам. У маёй калекцыі таксама рэпрэзентаваныя сучасныя лялькі-мотанкі, створаныя на аснове сучасных матываў і патрэб», — кажа Вольга Пашковіч.
На майстар-класах, што ладзіць Вольга для дзяцей і дарослых, людзі вывучаюць таксама культуру, традыцыі і абрады, звязаныя з гэтымі лялькамі.
«Лялькі — гэта не проста гульня, гэта гісторыя нацыі, ейны твар. На прыкладзе лялек я паказваю, чым яны адрозніваюцца і што абʼядноўвае славянскія народы. Я лічу гэта вельмі важным для захавання нацыянальнае культуры», — адзначае намінантка.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
