25 сакавіка польскія чыноўнікі выйшлі ў Беластоку на акцыю салідарнасці з беларускім журналістам і актывістам польскага паходжання Анджэем Пачобутам. Ён быў затрыманы роўна чатыры гады таму.
У гадавіну затрымання ўдзел у акцыі прынялі ваявода Падляскага ваяводства Яцэк Бжазоўскі, прэзідэнт Беластока Тадэвуш Трускаляскі, маршал Сената Малгажата Кідава-Блоньска.
— Анджэй Пачобут быў арыштаваны ў сімвалічны дзень, 25 сакавіка, калі адзначаецца свята незалежнасці Беларусі (Дзень Волі. — Заўв. MOST). Яго трымаюць у турме за тое, што ён казаў праўду, за сумленнасць, за тое, што ён паляк, за тое, што для яго важныя каштоўнасці. Успамінаючы пра Анджэя Пачобута, мы ўспамінаем пра ўсіх палітвязняў, — сказала Малгажата Кідава-Блоньска.
— Усе, хто прыходзіць сюды дзеля Анджэя Пачобута, гучна пратэстуюць, не пагаджаючыся на зло. Я веру, што наступіць час, калі Анджэй Пачобут будзе вольны і скажа ўсім нам, што было важна быць сумленным і стаяць на баку дабра, — адзначыў ваявода Яцэк Бжазоўскі.
Анджэй Пачобут быў затрыманы 25 сакавіка 2021 года ў сваім доме ў Гродне пасля ператрусу. З тых часоў застаецца ў зняволенні. Беларуская пракуратура абвінаваціла гродзенскага журналіста ў распальванні нацыянальнай варожасці, рэабілітацыі нацызму і закліках да санкцый. 8 лютага 2023 года палітзняволенаму Анджэю Пачобуту далі 8 гадоў калоніі.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
