У наступным годзе ў польскіх школах Гродна і Ваўкавыска ўводзіцца рускамоўнае навучанне. Пра гэта паведамляе Rzeczpospolita.
13 красавіка на бацькоўскім сходзе ў польскай школе №36 у Гродне кіраўніцтва ўстановы паведаміла, што ў наступным навучальным годзе вучні будуць займацца на адной з дзяржаўных моў Беларусі. Кіраўніцтва школы спаслалася на зменены закон аб адукацыі, у якім не прадугледжваецца навучанне на мове нацыянальных меншасцяў. Выкладанне польскай мовы і літаратуры можа быць арганізавана на адну гадзіну ў тыдзень — толькі па жаданні бацькоў і па згодзе мясцовай улады.
Па інфармацыі Rzeczpospolita, такі ж лёс чакае і школу ў Ваўкавыску. Навучальны год-2021/22 будзе апошнім для гэтых школ, калі вучні атрымаюць атэстат аб заканчэнні школы «з польскай мовай навучання». Бацькі вучняў павінны падпісаць афіцыйную паперу, у якой яны могуць пагадзіцца альбо адмовіцца ад навучання дзяцей у школе на наступны год.
Rzeczpospolita падкрэслівае, што бацькі і настаўнікі школ абураныя:
— На практыцы гэта азначае татальную русіфікацыю, бо беларускамоўных школ у Беларусі амаль няма (толькі 11% вучняў у 2020 годзе вывучалі ўсе прадметы па-беларуску), — дадае выданне.
У гродзенскай школе вучацца 620 вучняў, у ваўкавыскай — 250.
