У Польшчы працягвае даражэць паліва. І гэта адбываецца хутчэй, чым у іншых краінах Еўрасаюза. MOST тлумачыць, чаму так адбываецца.
Польшча з’яўляецца лідарам у Еўрапейскім саюзе па росце цэн на паліва, паведамляе Business Insider. Ад пачатку расійскага ўварвання ва Украіну сярэдняя цана літра бензіну вырасла больш, чым на 21%, а дызель — на 36%.
У некаторых еўрапейскіх краінах цана на паліва амаль не змянілася. Напрыклад, у Італіі цэны на бензін знізіліся. Польская арганізацыя нафтавай прамысловасці і гандлю падкрэслівае, што самае таннае паліва цяпер у Венгрыі.
300Gospodarka піша, што сітуацыя ў Польшчы не самая кепская. З вялікім ростам цэн паліва ў Польшчы ўсё роўна застаецца адным з самых танных у ЕС. Аднак калі параўноўваць з пакупніцкай здольнасцю, то Польшча знаходзіцца ў горшым становішчы. Напрыклад, у сярэднім паляк можа заправіць машыну 12 разоў на месяц, немец зробіць гэта 28 разоў, а датчанін — 33 разы.
Чаму растуць цэны
Па-першае, цэны на паліва значна выраслі пасля пачатку вайны ва Украіне. Пачатак вайны выклікаў сур’ёзныя хваляванні на паліўных рынках ва ўсім свеце. Сітуацыя супакоілася пасля навіны пра разблакіроўку стратэгічных запасаў нафты ЗША і краінамі, звязанымі з Міжнародным энергетычным агенцтвам.
Па-другое, з-за слабога злотага і таму, што польскі ўрад увёў антыінфляцыйныя меры яшчэ да пачатку расійска-ўкраінскай вайны. Пасля не засталося амаль ніякіх інструментаў для зніжэння цэн на паліва.
Аналітыкі BM Reflex паведамляюць, што цэны на паліва будуць паступова зніжацца. Яны падкрэсліваюць, што цэны не вернуцца да даваенных.
