У выдавецтве Gutenberg Publisher выйшла першая кніга Валянціна Вяркеева «Вера — дачка флібусцьера». Гэта прыгодніцкі раман для дзяцей і падлеткаў. Цікавасць да яго паказаў кніжны кірмаш у Варшаве, дзе ўдалося распрадаць увесь прывезены запас асобнікаў.
Сюжэт рамана захапляльны. Падчас буры адзінаццацігадовую Веру, дачку капітана пірацкага карабля, моцным ветрам уносіць у невядомым кірунку. На востраве, на якім апынулася дзяўчынка, яна знаёміцца з катом і кітом, якія дапамагаюць ёй трапіць на другі бераг мора, у партовы горад. З таго боку затанула пірацкая шхуна, а яе бацька апынуўся ў палоне ў сквапнага бургамістра, які хоча накласці рукі на пірацкае золата. Прайшоўшы шэраг выпрабаванняў, сустрэўшы новых сяброў, Вера дае рады знайсці тату і выратаваць горад ад катастрофы, якая пагражала сцерці яго з зямлі.
Аўтар спадзяецца, што кніга зацікавіць і дзяцей, і дарослых, бо ў ёй шмат карыснай інфармацыі (пададзены нават спосаб пабудовы паравой машыны), а канчатак не пакіне нікога раўнадушным.
«У фінале пачынаецца страшнае. Мне хацелася літаральна крыкнуць аўтару: ну навошта такая жорсткасць, навошта гэтулькі гора людзям? Трэба перарабіць, гэта ж прыгодніцкі тэкст, тут павінна быць шмат святла і дабрыні! Ды потым… Потым я перагарнуў старонку — і сціснулася літаральна сэрца ад аглушальных радкоў. Зразумеў: усё правільна, так павінна быць», — піша ў рэцэнзіі на кнігу пісьменнік Валерый Гапееў. І заключае: «Я дазволю сабе сказаць тое, пра што падумаў, дачытаўшы апошняе слова фантастычнай гісторыі: гэта — рэквіем».
«Вера — дачка флібусцьера» — першая кніга Валянціна Вяркеева. У Мінску ён працаваў настаўнікам фізікі і астраноміі, а потым — у бюро перакладаў. Зараз ён жыве ў польскім горадзе Торунь. У пісьменніка двое дзяцей, і ён прызнаецца, што менавіта калі нарадзілася дачка, з’явілася ідэя кнігі і прыдумалася назва. Прататыпамі галоўных герояў, зразумела, сталі дзеці аўтара.
«Калі знайшоўся вольны час — пачаў пісаць. Калі дапісаў, адчуў, што ў жыцці стала не хапаць чагосьці, і у той самы дзень пачаў пісаць новую кнігу, якая, мабыць, калі-некалі таксама дапішацца», — кажа Валянцін Вяркееў.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
