У пасольства Расіі ў Варшаве заканчваюцца грошы, бо польскія ўлады заблакавалі рахункі, а атрымаць з Масквы не атрымліваецца. Расійскі пасол абяцае адпомсціць у выпадку закрыцця варшаўскага пасольства. Аб гэтым піша выданне polsatnews.pl.
Пасол Расіі ў Варшаве Сяргей Андрэеў пагражае помстай, калі ў пасольства закончацца грошы. Напрыканцы сакавіка польскія ўлады выслалі з краіны 45 расійскіх дыпламатаў і заблакавалі рахункі пасольства. Пасольства не можа атрымаць новыя сродкі з Масквы, таму ўстанова можа перастаць працаваць.
— У нас ёсць некаторыя грашовыя рэзервы, але яны не бязмежныя. І калі сітуацыя не зменіцца, праз некаторы час можа здарыцца так, што мы не зможам аплаціць рахункі. І павінна быць зразумела, што як толькі наша пасольства тут перастане функцыянаваць, тое ж самае адбудзецца з пасольствам Польшчы ў Маскве, — выказаўся расійскі пасол.
Андрэеў не ўдакладніў, колькі наяўных грошай засталося ў пасольства ў Варшаве.
