Новы навучальны дапаможнік пад назвай «Беларуская мова. Практыкаванні і тэксты для чытання» выдадзены кафедрай беларусістыкі Варшаўскага ўніверсітэта, заўважыла «Наша Ніва».
Кніга разлічаная на тых, хто вывучае беларускую мову як замежную на пачатковых і сярэдніх узроўнях (A1—B1), пра гэта паведамляе афіцыйная старонка кафедры беларусістыкі Варшаўскага ўніверсітэта.
Аўтарка — вядомая мовазнаўца і выкладчыца ўніверсітэта Вольга Трацяк. Яна вядомая ў беларускай дыяспары як актыўная папулярызатарка роднай мовы: з 2019 года Вольга з’яўляецца ініцыятаркай і арганізатаркай міжнароднай акцыі «Беларуская дыктоўка» ў Варшаве, якая праводзіцца да Дня роднай мовы.
Таксама даследчыца ўваходзіць у Камісію сертыфікацыі валодання беларускай мовай і Галоўны камітэт Алімпіяды беларускай мовы ў Польшчы.
Новае грунтоўнае выданне мае 330 старонак, на якіх змешчана 150 практыкаванняў і 50 тэкстаў для чытання. Як адзначаюць на кафедры, заданні складзеныя такім чынам, каб паступова і сістэмна развіваць моўныя кампетэнцыі: ад разумення пісьмовага тэксту да пашырэння лексічнага запасу і працы над граматыкай.
Заяўлены кошт кнігі — 39 злотых.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
