Беларусы, якія жывуць у Беластоку, 22 сакавіка, напярэдадні 108-й гадавіны абвяшчэння незалежнасці Беларускай Народнай Рэспублікі, сабраліся на Рынку Касцюшкі.
Ваявода падляшскі Яцэк Бжазоўскі, які выступіў на мітынгу, адзначыў, што Дзень Волі — гэта свята-сімвал для ўсіх беларусаў, якія змагаюцца «за свабоду, годнасць і права самастойна вызначаць свой лёс».
Павел Станкевіч з Фонду Tutaka падкрэсліў, што Дзень Волі — гэта нагода для радасці, але ўжо некалькі гадоў святкаванне мае горкі прысмак. Бо ў некалькіх дзясятках кіламетраў ад Беластока, за мяжой Еўрапейскага саюза, тысячы людзей пакутуюць у турмах за мары пра дэмакратычную дзяржаву.
Падчас мітынгу са сцэны выступілі прадстаўнікі беларускай дыяспары, беларускай нацыянальнай меншасці ў Польшчы, а таксама ўкраінскай дыяспары. Таксама адбыўся канцэрт паэта Андрэя Хадановіча.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
