Польскія паліцэйскія са стральбой затрымалі ў Гайнаўцы трох грамадзян Украіны. Мужчыны перавозілі дзевяцярых нелегальных мігрантаў, наркотыкі і зброю. Аб гэтым паведамляе аддзел гайнаўскай паліцыі.
8 мая ля Гайнаўкі супрацоўнікі польскай паліцыі загадалі спыніцца мікрааўтобусу. Спачатку кіроўца прытармазіў, а пасля рэзка павялічыў хуткасць. Паліцэйскія пачалі пагоню, кіроўца ігнараваў патрабаванні спыніцца. Ля Гайнаўкі машына з’ехала на лясную дарогу, якая вяла ў тупік, — там іх схапілі супрацоўнікі паліцыі.
За рулём быў 20-гадовы ўкраінец, разам з ім яшчэ двое грамадзян Украіны — 24 і 25 год. Акрамя іх у машыне знаходзіліся дзевяць нелегалаў з Сірыі, Егіпту, Емену і Аману. Усе яны нелегальна перайшлі беларуска-польскую мяжу і незаконна знаходзіліся ў Польшчы.
У машыне ўкраінцаў паліцэйскія знайшлі марыхуану і амфетамін, а таксама зброю.
Затрыманым грамадзянам Украіны ўжо прад’явілі абвінавачванні па дапамозе ў незаконным перасячэнні мяжы — да васьмі год турмы. Таксама 20-гадовы ўкраінец абвінавачваецца ў тым, што не спыніўся для праверкі паліцыяй (да пяці год турмы), а 25-гадовы мужчына заслухаў абвінавачванні ў захоўванні наркотыкаў (да трох год турмы).
