У польскіх гарадах прайшлі акцыі, прымеркаваныя да Дня салідарнасці з палітычнымі зняволенымі, які адзначаецца 21 мая. У Варшаве мерапрыемства адбылося каля офіса Еўрапарламента, а ў Беластоку — каля консульства Беларусі. Паводле даных праваабарончага цэнтра «Вясна», зараз у беларускіх турмах знаходзіцца 841 чалавек, прызнаны палітвязнем.
Дзень салідарнасці з палітзняволенымі адзначаецца па ініцыятыве праваабаронцаў 21 мая. Дата прымеркаваная да гадавіны смерці Вітольда Ашурка — актывіста з Бярозаўкі каля Ліды, які быў асуджаны да пяці гадоў пазбаўлення волі і загінуў пры нявысветленых абставінах 21 мая 2021 года ў калоніі ў Шклове.
У Беластоку акцыя прайшла каля консульства Рэспублікі Беларусь. Удзельнікі ўшанавалі хвілінай маўчання памяць палітвязняў, памерлых за кратамі. Некаторыя з прысутных выступілі з прамовамі, у якіх заклікалі не забывацца пра беларусаў, што застаюцца ў турмах. Актывісты трымалі ў руках плакаты з партрэтамі палітычных зняволеных.
Акцыя ў Варшаве адбылася каля офіса Еўрапарламента на вуліцы Свентакшыскай, паведамляе Белсат. Удзельнікі прадставілі інсталяцыю «#67», назва якой адсылае да колькасці месцаў зняволення ў Беларусі. На стэндах з кратамі былі прымацаваныя фотаздымкі палітычных зняволеных. Пад кожным з партрэтаў размешчаны QR-код, які вядзе на старонку з інфармацыяй пра палітвязня.
Падчас акцыі прадстаўнікі Еўрапарламента перадалі намесніку кіраўніцы Аб’яднанага пераходнага кабінета Паўлу Латушку заяву з нагоды Дня салідарнасці.
— Сёння мы выказваем нашую нязменную салідарнасць з больш як 800 палітычнымі зняволенымі і ўсімі тымі, хто пераследуецца паводле палітычных матываў і застаецца за кратамі ў Беларусі. Нягледзячы на тое, што нядаўняе вызваленне шэрагу затрыманых з’яўляецца пазітыўнай падзеяй, якая прыносіць палёгку многім сем’ям, яно не адлюстроўвае сістэмных зменаў у рэпрэсіўнай палітыцы рэжыму. Палітычна матываваныя арышты, судовыя пераследы і пакаранні працягваюцца штодня, — гаворыцца ў заяве.
У гэты ж дзень у Варшаўскай Цытадэлі была адкрытая выстава «Галасы з-за кратаў», якую падрыхтаваў Музей Вольнай Беларусі.
Паводле падлікаў праваабарончага цэнтра «Вясна», на гэты момант у Беларусі 841 чалавек прызнаны палітвязнем, сярод іх 60 чалавек у цяжкім фізічным стане, 26 — ва ўзросце больш за 60 гадоў, восем палітвязняў маюць інваліднасць. 26 палітвязняў з’яўляюцца шматдзетнымі бацькамі. З 2020 года ў беларускіх турмах памерлі або загінулі дзевяць палітвязняў.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
