Беларус Юрась Меляшкевіч запусціў петыцыю да кіраўніцтва польскага Музея Бітвы пад Грунвальдам. Ён просіць усталяваць на Грунвальдскім полі бел-чырвона-белы штандар — побач са сцягамі Польшчы, Літвы і Украіны.
Петыцыя прымеркаваная да чарговай гадавіны Грунвальдскай бітвы, якая адбылася 15 ліпеня 1410 года. У звароце адзначаецца, што гэта была адна з найважнейшых падзей у гісторыі народаў Цэнтральнай і Усходняй Еўропы, а перамога над Тэўтонскім ордэнам стала агульнай для народаў Кароны Польскай і Вялікага Княства Літоўскага.
Грунвальдскае поле знаходзіцца на поўначы Польшчы, у Вармінска-Мазурскім ваяводстве, каля вёсак Грунвальд, Стэмбарк і Лодвігава. Менавіта там 15 ліпеня 1410 года адбылася Грунвальдская бітва — адна з найбуйнейшых бітваў сярэднявечнай Еўропы, у якой войскі Польскага Каралеўства і Вялікага Княства Літоўскага перамаглі Тэўтонскі ордэн.
Аўтар петыцыі падкрэслівае, што беларусы таксама былі неад’емнай часткай гэтай перамогі. У звароце гаворыцца, што харугвы Вялікага Княства Літоўскага, сфармаваныя на беларускіх землях — у Мінску, Полацку, Віцебску, Навагрудку, Гродне і іншых гарадах, — змагаліся пад Грунвальдам разам з іншымі ўдзельнікамі бітвы.
«Усталяванне побач з польскім, літоўскім і ўкраінскім сцягамі беларускага нацыянальнага бел-чырвона-белага штандарта з’яўляецца актам гістарычнай справядлівасці і салідарнасці паміж нашымі народамі», — гаворыцца ў петыцыі.
У звароце таксама адзначаецца, што бел-чырвона-белы сцяг для мільёнаў беларусаў з’яўляецца сімвалам свабоды, чалавечай годнасці і еўрапейскіх каштоўнасцяў. Аўтар нагадвае, што пад гэтым сцягам у 1918 годзе была абвешчаная Беларуская Народная Рэспубліка, а ў 1991 годзе Беларусь аднавіла сваю незалежнасць.
Асобна ў петыцыі згадваюцца падзеі 2020 года, калі бел-чырвона-белы сцяг стаў сімвалам мірнага народнага пратэсту супраць фальсіфікацыі выбараў і дыктатуры. Пасля пачатку поўнамаштабнай вайны Расіі супраць Украіны, як адзначаецца ў звароце, менавіта пад гэтым сцягам беларусы выказвалі салідарнасць з украінскім народам, займаліся валанцёрскай і гуманітарнай дапамогай, а многія таксама ўдзельнічалі ў абароне Украіны.
Юрась Меляшкевіч лічыць, што бел-чырвона-белы сцяг на Грунвальдскім полі стаў бы не толькі знакам памяці пра ўдзел беларусаў у перамозе 1410 года, але і сімвалам надзеі на свабодную і дэмакратычную Беларусь.
«Грунвальд быў месцам нашай агульнай перамогі. Няхай жа побач з польскім, літоўскім і ўкраінскім сцягамі лунае і беларускі бел-чырвона-белы сцяг — сімвал народа, які ўжо шмат стагоддзяў змагаецца за свабоду і годнасць», — гаворыцца ў звароце.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
