Памерла беларуская пісьменніца Святлана Курс, вядомая пад псеўданімам Ева Вежнавец. Пра гэта паведаміла яе сям’я.
54‑гадовая пісьменніца жыла ў Польшчы, апошнім часам яна змагалася з анкалагічным захворваннем.
Найбольш вядомы раман пісьменніцы «Па што ідзеш, воўча?», які выйшаў у 2020 годзе. За яго пісьменніца атрымала Прэмію імя Ежы Гедройця, пасля раман быў перакладзены на многія мовы свету.
На сумную падзею адрэагавала Святлана Ціханоўская:
«З вялікім болем даведалася пра смерць Святланы Курс. Гэта вялікае гора для блізкіх і сяброў, і вялікая страта для ўсёй Беларусі.
Сваім талентам і сваёй працай Святлана назаўсёды ўпісала сваё імя ў беларускую гісторыю і культуру.
Святлана зараджала беларусаў пазітывам, прыцягвала многіх да беларушчыны, натхняла і заўсёды выпраменьвала аптымізм. Яна была натхненнем для кожнага і кожнай, хто жыў беларускімі справамі, хто любіў Беларусь і рабіў нешта дзеля беларускай справы.
Нам будзе вельмі вас не хапаць, Святлана. Вашых словаў, вашых кніг, вашых парадаў і мудрых думак. Светлая памяць».
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
