Супрацоўнікі Нацыянальнага інстытута памяці Польшчы праводзяць раскопкі пад Беластокам у Пятрашскім лесе. Падчас іх былі знойдзены рэшткі шасці ахвяр камуністычнага рэжыму. Аб гэтым паведамляецца на сайце арганізацыі.
Раскопкі праводзіліся камандай Упраўлення пошуку і ідэнтыфікацыі Нацыянальнага інстытута памяці Польшчы. Яны прайшлі 9-13 мая пад Беластокам у Пятрашскім лесе.
Археалагічныя працы зладзілі з мэтай знайсці месцы пахавання ахвяр камуністычных злачынстваў. Папярэдне вывучаліся паказанні сведак і матэрыялы спраў, падчас якіх расследаваліся злачынствы супраць польскага народа.
Раскопкі ў Пятрашскім лесе праводзіліся ў другі раз. Першыя былі ў мінулым годзе: тады знайшлі пахавальную яму.
Гэтым разам навукоўцы знайшлі дзве магілы. У іх знаходзіліся пераблытаныя парэшткі мінімум шасці чалавек. У двух выпадках знойдзеныя косткі чэрапа маюць прыкметы агнястрэльных раненняў.
Плануюць правесці антрапалагічны і генетычны аналіз знойдзеных парэшткаў.
