26 верасня беларусы правядуць у Варшаве акцыю каля Упраўлення па справах замежнікаў (UDSC). Удзельнікі хочуць звярнуць увагу на адмовы беларусам у міжнароднай абароне.
Акцыя пад назвай «Калі ў Беларусі стала бяспечна?» пачнецца а 12:00 каля будынка UDSC па адрасе Taborowa 33.
У гэты ж дзень ведамства праводзіць «інфармацыйную суботу». З 9:00 да 15:00 замежнікі змогуць атрымаць кансультацыю па пытаннях легалізацыі, падаць дакументы, забраць лісты і гатовыя дакументы, у тым ліку карту побыту.
Па бягучых даных сайта migracje.gov.pl, з пачатку 2026 года па справах беларусаў аб міжнароднай абароне было вынесена 248 адмоўных рашэнняў.
Апошняя статыстыка Упраўлення па справах замежнікаў даступна за 7 месяцаў 2026 года. Згодна з ёй, за студзень-ліпень беларусы атрымалі 165 адмоў у міжнароднай абароне, але большасць з іх прыйшліся на чэрвень-ліпень. Са 108 спраў, якія ведамства разгледзела ў ліпені гэтага года, толькі па 14 хадайніцтвах заяўнікам была прадастаўлена абарона, гэта ўсяго 13%.
Для параўнання: у студзені — маі 2026 года доля адмоўных рашэнняў складала ўсяго 4,4%, у 2025 годзе іх было 5,5%, а ў 2024-м — 5,4%.
Арганізатары акцыі — супольнасць «Акцыі беларусаў Варшавы» і Беларуская асацыяцыя палітзняволеных «Да Волі» — нагадваюць, што ў Беларусі 889 чалавек прызнаныя палітвязнямі, а людзей працягваюць затрымліваць, супраць іх заводзяць крымінальныя справы, уключаюць у спісы «экстрэмістаў» і «тэрарыстаў».
Арганізатары таксама звяртаюць увагу на выпадкі пераследу беларусаў за ўдзел у акцыях за межамі краіны.
«Мы хочам атрымаць адказ: калі ў Беларусі стала бяспечна?» — гаворыцца ў анонсе акцыі.
Вы можете обсудить этот материал в нашем Telegram-канале. Если вы не в Беларуси, переходите и подписывайтесь.
