На з’езд партыі «Беларуская хрысціянская дэмакратыя» (БХД), які прайшоў 24 кастрычніка ў Беластоку, прыйшлі дзве дзяўчыны, якія хацелі рабіць фота і здымаць відэа з удзельнікамі мерапрыемства. Палітык і былы палітвязень Павел Севярынец западозрыў, што іх маглі накіраваць беларускія спецслужбы. Пра гэта ён расказаў на сваёй старонцы ў Facebook.
Паводле Севярынца, усё адбылося на пачатку рэгістрацыі ўдзельнікаў з’езда. Палітык абыходзіў залу, вітаўся з дэлегатамі і гасцямі. У нейкі момант ён заўважыў незнаёмую дзяўчыну гадоў дваццаці, якая выглядала напалоханай. Палітык падышоў да яе і паспрабаваў загаварыць па-беларуску, але дзяўчына яго не разумела. Тады Севярынец перайшоў на рускую мову і спытаў, хто яе запрасіў. «А вот этот человек, – паказвае ў тэлефоне кантакт. – Сделать жівые відео с участнікамі Съезда», – пераказаў размову Севярынец.
Дзяўчына сказала, што яна з Украіны. Пасля гэтага палітык адвёў яе да Анатоля, які адказваў за бяспеку мерапрыемства. Той распытаў дзяўчыну і сфатаграфаваў кантакт чалавека, які, паводле яе слоў, папрасіў здымаць удзельнікаў з’езда.
Неўзабаве каля стала рэгістрацыі з’явілася яшчэ адна дзяўчына. Яна таксама хацела зарэгістравацца ў якасці госці і гаварыла пра «жывое відэа». Севярынец западозрыў, што абедзве дзяўчыны маглі выконваць заданне беларускіх спецслужбаў.
Падобныя выпадкі былі і раней
Гэта не першы выпадак, калі невядомыя наймаюць людзей для здымкі ўдзельнікаў беларускіх мерапрыемстваў за мяжой. У сакавіку 2026 года ў Вільні трое маладых людзей з Украіны здымалі акцыю да Дня Волі. Пазней гэтыя кадры паказалі на беларускім дзяржаўным тэлеканале СТБ. Як высветлілі журналісты «Радыё Свабода», аднаго з удзельнікаў здымкі, 19-гадовага ўкраінскага студэнта, наняла жанчына, якая прадстаўлялася пасярэдніцай журналістаў «Новай газеты Еўропа». Сам хлопец сцвярджаў, што не ведаў, для чаго насамрэч будуць выкарыстаныя відэа.
Падобныя выпадкі фіксавалі і ў Польшчы. У ліпені 2026 года стала вядома, што польскае Агенцтва ўнутранай бяспекі (ABW) затрымала беларуса і паляка, якіх падазраюць у супрацоўніцтве з беларускімі спецслужбамі. Паводле следства, яны за грошы наведвалі мерапрыемствы беларускай дыяспары ў Варшаве, фатаграфавалі і здымалі іх удзельнікаў. Сабраныя матэрыялы перадавалі беларускім спецслужбам і выкарыстоўвалі ў дзяржаўнай прапагандзе.
