Суд у Беластоку змякчыў прысуд грамадзяніну Расіі за кантрабанду гашышу. Мужчыну асудзілі на восем гадоў зняволення, але Апеляцыйны суд палічыў прысуд занадта жорсткім. Пра справу паведамляе Radio Białystok.
52-гадовы расіянін ехаў з Іспаніі ў Расію праз Польшчу. Яго затрымалі падчас праверкі, якую памежнікі праводзілі на польска-літоўскай мяжы.
У мужчыны знайшлі ў схованцы ў аўтамабілі наркотыкі на суму каля 2,3 мільёнаў злотых. Расіянін перавозіў амаль 48 кілаграмаў гашышу.
У лістападзе 2021 года мужчыне прысудзілі восем гадоў пазбаўлення волі і 20 тысяч злотых штрафу. Апеляцыйны суд Беластока вырашыў зменшыць прысуд да пяці гадоў турмы. Гэты прысуд канчатковы і не можа быць абскарджаны.
Падчас следства высветлілася, што 52-гадовы расіянін быў не адзіным расійскім наркакур’ерам. Пасля былі затрыманыя яшчэ некалькі мужчын з расійскім грамадзянствам. Яны перавозілі звыш 65 кілаграмаў гашышу.
