Былы беларускі палітвязень Ціхан Клюкач сышоў з палка імя Кастуся Каліноўскага, у якім беларускія добраахвотнікі змагаюцца на баку Украіны супраць расійскай агрэсіі. Ён расказаў MOST, што праслужыў у палку ўсяго тыдзень. З дазволу Ціхана прыводзім яго каментарый, які ён апублікаваў на сваёй старонцы ў Facebook.
«На жаль для мяне і не толькі для мяне, я сышоў з палка імя Каліноўскага. Чаму гэта адбылося? Па-першае, падрабязнасцей усіх па зразумелых прычынах раскрываць не магу. Па-другое, адразу скажу, што прэтэнзій ані да большасці камандавання, ані да хлопцаў не маю. Справа ў адным чалавеку, у нанесенай абразе і спробе прасунуць у палку армейшчыну ў найгоршым разуменні гэтага слова. З боку гэтага чалавека.
Я пайшоў на прынцып. І я не збіраюся цярпець неадэкватныя дзеянні ў дачыненні да мяне, з чыйго б боку яны не зыходзілі, у ваенны час ці ў мірны, усё роўна. Мне неадэквату за паўтара года турмы і зоны хапіла. Калі выбіраць паміж падпарадкаваннем незразумела каму, з хворай фантазіяй і галавой наогул, і асабістай маёй годнасцю, то я абіраю годнасць. І прынцып.
Страх або баязлівасць да гэтай сітуацыі дачынення не маюць. Папракаць мяне баязлівасцю, прабачце, смешна, пасля прыгод у беларускай пенітэнцыярнай сістэме ніякая смерць ужо не страшная.
Зноў скажу, каб не было непаразуменняў: справа не ў палку, справа ў адным чалавеку. А на каліноўцаў працягваю спадзявацца як на адзіную пакуль што рэальную сілу, што ставіць сваёй канчатковай мэтай фізічнае знішчэнне рэжыму Лукашэнкі. У іх свой шлях, у мяне свой. А мая барацьба трывае, дзе б я ні быў».
Полк імя Каліноўскага: баец здзейсніў правіну, ад адэкватнага пакарання адмовіўся
MOST звярнуўся па каментарый да прадстаўнікоў палка Каліноўскага.
— Баец знаходзіўся ў вучэбнай роце. Заступіў на дзяжурства па базе. Здзейсніў самастрэл у бок жылых кварталаў падчас нясення службы, што з’яўляецца правінай. Камандзір прызначыў яму адэкватнае пакаранне (дзень хадзіць у бронекамізэльцы), той адмовіўся. Не маем часу для заспакаення тонкай душэўнай арганізацыі кожнага байца, — расказалі ў палку.
Хто такі Ціхан Клюкач?
Ціхану Клюкачу было 18 гадоў, калі яго з дзяўчынай Сафіяй затрымалі ў 2020 годзе на акцыях пратэсту ў Мінску. Хлопец правёў за кратамі паўтара года і выйшаў у сакавіку 2022-га. Заставацца ў Беларусі Ціхан не хацеў і выехаў у Варшаву, каб працягнуць барацьбу з рэжымам Лукашэнкі. Там ён звярнуўся ў пункт беларускіх добраахвотнікаў, якія ваююць ва Украіне, і праз час далучыўся да палка імя Кастуся Каліноўскага.
Інтэрв’ю Ціхана, якое запісваў MOST перад адпраўкай на вайну, можна паглядзець ТУТ.
