За апошнія шэсць месяцаў кошт кантрабанды праз польска-беларускую мяжу знізіўся амаль на 90%. У першую чаргу, гаворка ідзе пра кантрабандныя цыгарэты. Пра гэта паведаміла Radio Białystok прэс-сакратар Падляшскага памежнага атрада Катажына Здановіч.
Па ацэнках польскіх памежнікаў, кошт кантрабандных тавараў за апошнія шэсць месяцаў значна знізіўся ў параўнанні з тым жа перыядам 2021 года.
Кошт кантрабандных цыгарэт, якія арыштавалі памежнікі за апошнія паўгода, — 5 мільёнаў злотых. У мінулым годзе ён складаў 43 мільёны злотых.
Памежнікі падкрэсліваюць, што з пачаткам міграцыйнага крызісу кантрабандысты перайшлі з перавозкі цыгарэт на перавоз людзей праз мяжу. Пра пераключэнне ўвагі кантрабандыстаў сведчыць і колькасць «кур’ераў», якіх памежнікі артыштавалі за апошнія паўтара года: гэта каля 600 чалавек.
