Астравецкая бібліятэка не будзе насіць імя беларускага навукоўца Адама Мальдзіса. Гродзенскі аблвыканкам вырашыў адмяніць рашэнне раённай адміністрацыі пасля скаргі праўладнай актывісткі з Гродна Вольгі Бондаравай. Пра сітуацыю расказвае «Радыё Свабода».
Гродзенскі аблвыканкам адмяніў рашэнне аб наданні астравецкай бібліятэцы імя беларускага навукоўца Адама Мальдзіса. Пра рашэнне паведаміла гродзенская актывістка Вольга Бондарава, вядомая сваёй падтрымкай Лукашэнкі і расійскай агрэсіі ва Украіне.
Вольга Бондарава з ліпеня пачала абурацца наконт надання астравецкай бібліятэцы імя Мальдзіса. Асноўная прэтэнзія Бондаравай была ў тым, што, па яе меркаванні, Адам Мальдзіс быў «калабарантам».
Адам Мальдзіс — доктар філалагічных навук, даследчык. Працаваў у Інстытуце літаратуры Акадэміі Навук БССР. Стварыў Нацыянальны навукова-асветніцкі цэнтр імя Францыска Скарыны. Памёр 3 студзеня 2022 года. Яго пахавалі на малой радзіме ў вёсцы Задворнікі Астравецкага раёна.
