Цэнтр беларускай салідарнасці атрымаў ад польскага Упраўлення па справах іншаземцаў падрабязную інфармацыю пра колькасць беларусаў, якія жывуць у Польшчы на пастаянных умовах, паведамляе Польскае радыё.
Паводле афіцыйных звестак, на канец чэрвеня 52 313 грамадзян Беларусі маюць дзейны дакумент, які дае права на сталае знаходжанне на тэрыторыі Польшчы.
Сярод іх:
- 28 179 маюць пастаянны від на жыхарства;
- 20 053 маюць часовы від на жыхарства;
- 2 415 атрымалі дадатковую абарону;
- 864 маюць дазвол на знаходжанне доўгатэрміновага рэзідэнта ЕС;
- 508 атрымалі часовую абарону;
- 294 атрымалі статус бежанца.
Часцей за ўсё беларусы падавалі прашэнні на від на жыхарства ў Мазавецкім, Паморскім і Падляскім ваяводствах.
Пасля 2020 года беларусы сталі самай шматлікай групай, якая падае прашэнні аб наданні міжнароднай абароны.
Большасць беларусаў, якія прыехалі ў Польшчу, — гэта людзі ва ўзросце ад 20 да 39 гадоў, сярод іх 56% — мужчыны і 44% — жанчыны.
З 10 жніўня 2020 года па 30 чэрвеня 2022 года грамадзянам Беларусі выдалі 36 614 гуманітарных віз, а таксама 42 932 візы па праграме Poland.Business Harbour.
