У Мікалая Аўтуховіча сур’ёзныя праблемы са здароўем. Пра гэта паведамляе праваабарончы цэнтр «Вясна».
8 жніўня на судовым працэсе па «справе Аўтуховіча» палітвязень расказаў пра свой стан пасля сухой галадоўкі. Аўтуховіча вярнулі на судовае пасяджэнне пасля таго, як выдалілі за так званыя сістэмныя парушэнні. Праваабарончы цэнтр «Вясна» спасылаецца на прапагандысцкае выданне «СБ», якое адзначае, што палітвязень спыніў галадоўку 1 жніўня. Медыкі не жадаюць называць адмову Аўтуховіча не есці больш за 20 дзён галадоўкай, бо, па іх словах, ён прымаў за гэты перыяд «нейкую колькасць вады і вугляводаў» — пра гэта сведчаць даследаванні аналізаў.
Аўтуховіч не згодны з вынікамі медыкаў:
— 27 ліпеня быў узяты аналіз, які праз чатыры дні паказаў, што арганізм цалкам абязводжаны, раскладаюцца тканкі нырак. Маё здароўе цалкам падарвана.
