Беларускі гурт Znich, які грае ў стылі паган-фолк-метал, выступіў у польскім шоу талентаў Must Be The Music. Атрымаўшы два «так» і два «не», беларусы не прайшлі далей, але іх нумар сабраў шмат захопленых водгукаў гледачоў.
Беларусы выканалі песню «Сягодня ў нас Купала». Удзельнікі гурта выступалі ў драўляных масках-карабошках, якія калісьці выкарыстоўваліся падчас рытуалаў на Дзяды, а на сцэне стаялі знічы.
«Не сказалі ані слова, але як выступілі», — суправаджае нумар афіцыйны Instagram шоу.
Насамрэч удзельніца гурта Уля патлумачыла журы, пра што была песня і як выкарыстоўваліся маскі.
Хоць меркаванні суддзяў падзяліліся, водгукі пад выступам паказваюць, што гледачы былі ў захапленні, а шмат хто выказваў пажаданні трапіць на канцэрт калектыву.
«Яны былі выдатныя!!! Не разумею вердыкту журы», — напісала адна з каментатарак.
«Я іх палюбіла і галасавала за іх, пашукаю іх у сеціве, трэк супер і гэтыя строі», — адзначыла іншая.
«Чаму гэта не прайшло? Гэта, верагодна, найлепшы метал-гурт з часу аднаўлення гэтай праграмы!» — не хавае эмоцый яшчэ адзін каментатар.
Гурт Znich быў заснаваны ў 1996 годзе ў Мінску Алесем Таболічам. Калектыў удзельнічаў у беларускім «Еўрабачанні-2016», але не прайшоў у фінал. Зараз у склад гурта ўваходзяць пяць музыкантаў, усе яны жывуць і працуюць у Польшчы.
«Кожны з удзельнікаў гурта сцвярджае, што любоў да музыкі пачалася ад іх прабабуль, якія вучылі іх песням сваіх бацькоў. Дзякуючы гэтаму яны могуць звяртацца да гісторыі, прадстаўляючы яе ў аўтарскай форме», — заўважылі арганізатары шоу.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
